BÎRDANKA TÎRMEHÊ / Gulistan Awaz 

 BÎRDANKA TÎRMEHÊ / Gulistan Awaz 

ـــــــــــــــــــ

Hatina te

Bi çi meraqî

Gilokên keseran

          Ji hev vekirin

Li ber wan sozên

Xuhdana pîroz

Pinpinkên eşqê

Difirînin

Berve gulistana

             Sîngê esmer

Hatina te

Ji ser eniya Tîrmeha bêxew

Dimalîne

Xemgîniyên sibehên sor

Vala dikin

         Di gewriya

                       Dûrîtiyê de

Şûnşûpên lêvên te

Li ser kesk bejna wê

Tovên şermokiyê

                      Diseridînin

Axînên xunavgirtî

Di nav tiliyên te de

Mêlodiyên vehesê

                        Dijenînin

Çendî şah dibin

Bi hatina te re

Zeviyên mangên sor

Peyvên şil

Ji sibehên hevdîtinê

Ser tîna helbestê

Dibarînin

Belê

Di bîrdanka Tîrmehê de

Ji bîr nabe

        Dilovaniya

            Canê germ